Waxaa soo dhammaday Shirkii hordhaca ahaa ee u socday Madaxda Dowlad Goboleedyada dalka iyo Dowladda Federaalka Soomaaliya, waxaana maanta looga hadlay shirka qodobbo dhowr ah oo ku xeeran arrimaha la isku khilaafsan yahay ee doorashada.
Maanta oo ahayd maalinta labaad waxay Madaxdu ka hadleen Ajandaha Shirka Doorashada iyo arrimaha kale ee taagan, kuwaasi oo madaxdu ay si weyn kaga doodeen.
Waxaana Maanta si gaar ah looga hadlay qodobada muhimka u ah arrimaha doorashada, sida qabsoomida Shirka Doorashada iyo caqabadaha kale ee ku xeeran, Madaxda ayaa Berito soo sameyn doona la tashiyo dhexdooda ah waxayna isu soo laaban doonaan talaatada oo ah 06-da April 2021.
Wararka qaar ayaa sheegaya in ay jiraan qodobada qaar oo la isku fahmi waayay, kuwaasi oo madaxdu ay wadatashiyo kasii sameyn doonaan, waxaana taasi ay keentay in shirku uu maalin hakad galo si wadatashiyo looga sameeyo qodobada qaar ee ilaa iyo hadda aan la isku fahmin.
Shirka ayaa haatan u muuqda mid sii xasaasi ah, waxaana socda oo kulamada gaar gaarka ah ee Madaxdu leeyihiin, iyadoo ay jiraan dadaalo xooggan oo beesha caalamku ku bixinayso sidii ay u dhici laahyd doorasho la isku raacsan yahay oo aan hal dhinac ahayn, waxaana shirka qayb ka ah Puntland iyo Jubbaland oo markii hore diiday in ay ka qayb galaan shirkii Madaxweyne farmaajo isugu yeeray Madaxda dowlad Goboleedyada.
