Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, ayaa kulan gaar ah magaalada Jeddah kula yeeshay Wasiirka Arrimaha Dibadda, Socdaalka iyo Jaaliyadaha ee Masar, Dr. Badr Abdelatty, intii uu socday shirka aan caadiga ahayn ee Golaha Wasiirrada Arrimaha Dibadda ee Ururka Iskaashiga Islaamka (OIC).
Kulanka labada wasiir ayaa si gaar ah diiradda loogu saaray aqoonsiga sharci-darrada ah ee Israa’iil siisay Somaliland, oo ka tirsan waqooyi-galbeed Soomaaliya. Labada dhinac ayaa si adag u diiday tallaabo kasta oo wax u dhimaysa midnimada, madax-bannaanida iyo wadajirka dhuleed ee Jamhuuriyadda Federaalka Soomaaliya.
Wasiirradu waxay sidoo kale carrabka ku adkeeyeen muhiimadda dhowrista sharciga caalamiga ah, iyagoo muujiyay taageero buuxda oo ay u hayaan dhammaan dadaallada lagu ilaalinayo midnimada qaran, xasilloonida iyo dowladnimada Soomaaliya.
Kulankan ayaa muujinaya mowqif mideysan oo ay Soomaaliya iyo Masar ka qaateen arrimaha la xiriira midnimada Soomaaliya, gaar ahaan xilli ay taagan yihiin caqabado diblomaasiyadeed oo xasaasi ah.