Somaliland ayaa la sheegay inay joojisay oggolaanshihii degista ee shirkadda diyaaradaha Air Djibouti, taas oo keentay in la hakiyo afar duulimaad toddobaadkii ah oo u kala gooshi jiray Jamhuuriyadda Jabuuti iyo Somaliland.
Go’aankan ayaa yimid kaddib khilaaf diblomaasiyadeed oo sii xoogeysanaya, kaas oo salka ku haya diidmada dowladda Jabuuti ee aqoonsiga ay Israa’iil siisay Somaliland, arrin si weyn u kicisay xiisadaha siyaasadeed ee ka aloosan Geeska Afrika.
Hakinta duulimaadyada ayaa si gaar ah u saameysay ganacsatada iyo xubnaha qurbo-joogta, kuwaas oo si joogto ah u adeegsan jiray khadkaas hawada, sida ay sheegayaan warar soo baxaya.
Ilo-wareedyo ayaa tilmaamaya in Air Djibouti ay qorsheyneyso inay arrintan ka soo saarto war rasmi ah, iyadoo shirkaddu horey u fulin jirtay duulimaadyo joogto ah oo dhowr jeer toddobaadkii ah oo ay ku tagi jirtay Somaliland.
Ilaa iyo hadda, Somaliland iyo Air Djibouti midkoodna si rasmi ah ugama hadlin faahfaahinta go’aankan, balse xog-ogaal ayaa xaqiijinaya in khilaafka u dhexeeya Jabuuti iyo Somaliland uu si toos ah ugu xiran yahay mowqifka Jabuuti ee ka dhanka ah aqoonsigii ay Israa’iil sheegtay inay siisay Somaliland.
Jamhuuriyadda Jabuuti, oo ay wehliyaan dalal kale, ayaa si adag uga horyimid tallaabada Israa’iil, iyagoo mar kale muujiyay taageerada ay u hayaan Dowladda Federaalka Soomaaliya iyo midnimada dhuleed ee dalka.
Xiisaddan diblomaasiyadeed ayaa sidoo kale horseedday in Somaliland ay dhawaan u yeerato wakiilkeedii u joogay Jabuuti, tallaabadaas oo muujinaysa heerka sare ee khilaafka siyaasadeed ee ka dhex aloosan labada dhinac.
