Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa safar rasmi ah ku tegaya magaalada Nairobi ee dalka Kenya, halkaas oo uu kula kulmi doono Madaxweynaha Kenya, William Ruto.
Kulanka labada madaxweyne ayaa diiradda lagu saari doonaa arrimo muhiim ah oo quseeya amniga gobolka, xiriirka labada dal iyo xaaladda siyaasadeed ee Soomaaliya, xilli gobolka Geeska Afrika uu wajahayo isbeddello siyaasadeed oo xasaasi ah.
Mid ka mid ah qodobada ugu waaweyn ee miiska saaran ayaa ah faragelinta Israa’iil ee arrimaha Soomaaliya, gaar ahaan arrinta aqoonsiga beenta ah ee Somaliland, taas oo si weyn walaac uga abuurtay dowladda federaalka iyo dalal badan oo taageera midnimada Soomaaliya.
Dowladda Kenya ayaan ilaa hadda si rasmi ah u shaacin mowqif cad oo ku saabsan aqoonsiga Somaliland, waxaana la filayaa in kulankan Nairobi uu Madaxweyne Xasan Sheekh ku adkeyn doono mowqifka dowladda Soomaaliya ee diidmada kala goynta dalka.
Sidoo kale, labada madaxweyne ayaa ka wadahadli doona arrimaha amniga Geeska Afrika, la dagaalanka Al-Shabaab, iyo xaaladda Badda Cas, iyadoo Kenya ay door muhiim ah ka qaadato hawlgallada amni ee ka socda Soomaaliya, maadaama ciidamo ka tirsan Hawlgalka AUSSOM ay weli ku sugan yihiin dalka.
Wararka ayaa sheegaya in Soomaaliya ay dooneyso in Kenya ay si buuxda u taageerto mowqifka dowladda federaalka, gaar ahaan ka hortagga taageero kasta oo loo muujiyo Somaliland, xilli ay isa soo tarayaan dhaqdhaqaaqyo diblomaasiyadeed oo arrintaas la xiriira.
Dhanka kale, Madaxweyne Xasan Sheekh Maxamuud ayaa qorsheynaya safarro kale oo uu ku tago dalalka Geeska Afrika, iyadoo ay taagan tahay xiisad siyaasadeed oo ka dhalatay aqoonsigii ugu horreeyay ee Somaliland ay sheegtay inay heshay toddobaadkii hore.
Safarkan Nairobi ayaa loo arkaa mid muhiim u ah istaraatiijiyadda dowladda Soomaaliya ee ku aaddan xoojinta taageerada gobolka iyo tan caalamiga ah, si looga hortago khataraha amni iyo kuwa siyaasadeed ee la xiriira midnimada iyo madax-bannaanida Soomaaliya.
