Ra’iisul Wasaarihii hore ee Soomaaliya, Mudane Cumar Cabdirashiid Cali Sharma’arke, ayaa ka hadlay xiisadda ka dhalatay qabashada markabka MV Sea World ee agabka milatari u siday Turkiga, isagoo ku baaqay in Maamulka Puntland uu si degdeg ah u fuliyo waajibaadkiisa sharciyeed.
Hadalkan ayaa yimid kadib kulan uu maanta la yeeshay Safiirka Turkiga u fadhiya Soomaaliya, kaas oo shaaciyay in markabkaasi sido qalab ciidan.
Safiirka Turkiga ayaa Mudane Sharma’arke u sheegay: “Markabka MV Sea World waxa uu sido agab milatari oo sharci ah. Waxaan la xiriirnay Puntland si loo fududeeyo socdaalkiisa, balse wali wax jawaab ah lagama helin.”
Arrintan waxa ay ku soo aadaysaa iyadoo xiisadda ka dhalatay Markabka MV Sea World ee u qafaalan Maamulka Puntland ay cirka isku sii shareerayso. War-saxaafadeedyo isdiiddan ayaa ka soo kala baxaya dowladda federaalka iyo maamulka xubinta ka ah ee Puntland.
