Golaha Ammaanka ee Qaramada Midoobay ayaa lagu wadaa in uu 15-ka May yeesho kulan gaar ah oo muhiim ah, kaas oo diiradda lagu saarayo sidii loo heli lahaa taageero dhaqaale oo joogto ah oo la siiyo ciidamada nabad-ilaalinta Midowga Afrika ee ATMIS, kuwaas oo hawlgal ka wada gudaha Soomaaliya.
Kulanka ayaa ku soo beegmaya xilli ay isa soo tarayaan baaqyada caalamiga ah ee lagu dalbanayo in hawlgalkan muhiimka ah laga maalgeliyo sanduuqa Qaramada Midoobay, halkii lagu sii wadi lahaa habka tabarucaadka tooska ah ee ka yimaada dalalka reer galbeedka.
Si kastaba ha ahaatee, dowladda Mareykanka ayaa si cad u diidday in ay taageerto qaraarka cusub ee la filayo in la horgeeyo Golaha Ammaanka maalintaas, kaasi oo loogu talagalay in sanduuqa Qaramada Midoobay uu noqdo isha ugu weyn ee maalgelinta ciidanka ATMIS. Washington ayaa wali ka caga-jiidaysa in Qaramada Midoobay si toos ah u damaanad qaado miisaaniyadda howlgalka.
Dhanka kale, Midowga Yurub ayaa ballan qaaday in uu bixiyo $60 milyan oo ka mid ah $120 milyan ee loo baahan yahay si loo taageero hawlgalka ATMIS muddo afarta sano ee soo socota ah. Waxaa sidoo kale la soo jeediyay in shirweyne caalami ah lagu qabto dalka Qatar, si loo helo taageero dhaqaale oo dheeraad ah oo lagu sii xoojiyo hawlgalka.
Khilaafka u dhexeeya waddamada waaweyn ee xubnaha joogtada ka ah Golaha Ammaanka – gaar ahaan Mareykanka – ayaa u muuqda caqabad weyn oo ku hor gudban qorshaha lagu xoojinayo taageerada ATMIS. Hase yeeshee, madaxda Qaramada Midoobay iyo Midowga Afrika waxay rajo ka qabaan in kulanka 15-ka May uu noqon doono mid dhaxal gal ah oo horseeda is-afgarad iyo tallaabooyin wax ku ool ah.
