Ciidanka Xoogga Dalka Soomaaliyeed iyo ciidamada deegaanka ayaa saaka howlgal ballaaran oo qorsheysan ka fulinaya deegaanno muhiim ah oo ku yaalla koonfurta gobolka Mudug. Howlgalkan, oo si gaar ah diiradda loogu saarayay deegaannada ku dhow degmada Xarardheere, ayaa lagu soo warramayaa in ciidamada ay la wareegeen gacan ku haynta deegaanka Baraag Cali Gaduud, oo ku dhowaad 50KM dhinaca galbeed kaga beegan Xarardheere.
Saraakiisha hoggaamineysa howlgalka ayaa warbaahinta la wadaagay in hawlgalkan uu qayb ka yahay dadaalka joogtada ah ee lagu xoreynayo deegaannada ay gacanta ku hayaan Al-Shabaab, kuwaas oo wali ku sugan qeybo ka mid ah dowlad goboleedka Galmudug. Howlgalka ayaa ah mid qeyb ka ah ololaha waaweyn ee Dowladda Federaalka Soomaaliya ay ku doonayso inay ku cirib-tirto xubnaha Al-Shabaab ee weli ku dhuumaaleysanaya gobollada dhexe iyo koonfureed ee dalka, iyagoo taageero ka helaya ciidamada deegaanka oo si firfircoon uga qeyb qaadanaya dagaalka ka dhanka ah kooxdan argagixisada ah.
Ciidanka Xoogga Dalka iyo kuwa deegaanka ayaa tan iyo markii uu billowday howlgalka ballaaran ee ka dhanka ah Al-Shabaab, guulo ka gaaray deegaanno badan oo horey ay kooxdaasi u maamuli jirtay.
Baraag Cali Gaduud oo ka mid ah deegaannada istiraatiijiga ah ayaa muhiim u ah isku xirka magaalooyinka gobolka, gaar ahaan degmada Xarardheere iyo deegaannada ku dhow.
La wareegidda deegaankaasi ayaa u oggolaan doonta ciidamada inay ku sii durkaan deegaannada kale ee ku dhow, iyaga oo sii xoojinaya xasilloonida gobolka.
