Guddoomiyaha Gobolka Banaadir ahna Duqa Magaalada Muqdisho Cumar Maxamuud Maxamed (Cumar Filish) ayaa maanta kulan gaar ah la qaatay Guddoomiyaha Ururka Dhallinyarada Gobolka Banaadir iyo Guddoomiyaasha dhallinyarada degmooyinka.
Kulankan ayaa waxaa uu ujeedkiisu ahaa sidii loo xoojin lahaa wacyigalinta la-dagaalanka maandooriyaha noocyadiisa kala duwan oo xiligaan si xoogan uga socday magaalada Caasimadda ah ee Muqdisho.
Kulankani ayaa inta uu socday waxa uu Guddoomiyaha warbixina kala duwan ka dhageystay dhallinyaradii kulanka ka qeyb gashay, kuwaas oo tilmaamay sida ay diyaar ugu yihiin ka qeyb qaadashada doorkooda ku aadan la-dagaalanka Muqaadaraadka iyo horumarinta dhalinyarada magalada muqdisho
Guddoomiye Cumar Filish ayaa kula dardaarmay dhallinyarada Muqdisho iney meel ugu soo wada jeestaan cirib tirka Maandooriyaha oo ah caqabad hor taagan horumarka dhallinyarada iyo Xasiloonida Caasimadda.
Magaalada Caasimadda ah ee Muqdisho ayaa waxaa muddooyinkii dambe kusoo badanayay waxyaabaha maanka dooriya, iyadoona laamaha amniga gacanta ku dhigeen waxyaabo farabadan oo kamid ah maandooriyeyaasha, sidoo kalena la burburiyey goobo lagu farsameyn jiray Calaqa iyo xashiishka.
