Guddoomiyaha Gobolka Banaadir ahna Duqa Muqdisho Cumar Maxamuud Maxamed Filish ayaa si kulul uga hadlay qarax Is-miidaamin ah oo gelinkii dambe ee shalay ka dhacay Magaalada Muqdisho gaar ahaan Bar koontarool oo ku taalla degmada Wadajir.
Guddoomiye Cumar Filish ayaa qaraxaas oo lala beegsaday Bar koontarool ay ku sugnaayeen Ciidamo ka tirsan dowladda Federaalka ku tilmaamay inuu ahaa mid fog Islaamnimada iyo Bini’aadanimada, kaasi oo geystay khasaaro dhimasho iyo dhaawac.
Wuxuu tacsi u diray Guddoomiyaha dadkii ku geeriyooday qaraxa oo u badnaa Askar ka tirsaneyd Ciidanka dowladda, isla markaana waxaa uu Alle uga baryay inuu Caafimaad deg deg ah siiyo dadkii ku dhaawacmay oo la geeyay Xarumo Caafimaad.
Ugu danbeyn Guddoomiyaha Gobolka Banaadir Cumar Maxamuud Maxamed Filish ayaa ugu baaqay bulshada Soomaaliyeed in ay si wadajir ah ugu midoobaan la dagaalanka Al-shabaab, si ummada ay ugu noolaadan Nabad iyo Horumar.
Qarax loo adeegsaday gaari laga soo buuxiyay waxyaabaha qarxa ayaa lala beegsaday Bar koontarool oo ku taalla afaafka hore ee xerada Xalane ee degmada Wadajir ee Gobolka Banaadir, waxaana ku geeriyooday in ka badan 11 qof, halka tirro kalena ay ku dhaawacmeen, isla markaana waxaa mas’uuliyadiisa sheegtay Al-shabaab.