Diyaarad ay leeyihiin militariga Nigeria oo raadinaysay dad lagu afduubtay waqooyiga dalkaas ayay soo rideen koox burcad ah, sida ay shaaciyeen taliska militariga.
Af hayeen u hadlay ciidamada cirka ee Nigeria ayaa sheegay in diyaaradda oo nooceedu ahaa Alpha Jet ay si guul ah ku dhammeysay howlgal ay fulinaysay xilligii la weerarayay Axaddii.
Wuxuu intaas ku daray in duuliyihii diyaaraddaas, oo lagu magacaabo Lt Abayomi Dairo, uu ka booday kaddibna adeegsaday xeelado uu ku badbaado, si aysan gacanta ugu dhigin burcadda.
Dadka deegaanka ayaa gabbaad siiyay duuliyaha sida uu sheegay afhayeenka.
Weerarkan ayaa ka dhacay xadka kala qaybiya gobollada Zamfara iyo Kaduna.
Kooxaha hubaysan ayaa lagu eedeeyay inay ka dambeeyaan afduubyo dhawaan loo geystay qaar ka mid ah dadka deegaanka ee ku sugan waqooyiga-galbeed ee dalka Nigeria.
Arday iyo carruur iskuuley ah ayaa si gaar ah loogu bar tilmaameedsadaa weerarrada ay fuliyaan – in ka badan 1,000 qof ayayna afduubteen tan iyo bishii December.
Inta badan dadkaas ayaa lagu soo warramay in la sii daayay kaddib markii laga bixiyay madax furasho, laakiin qaarkoodna waa la dilay.
