Muuqaal Video ah oo ay Kooxda Boko Haram soo saartay waxay si rasmi ahaan u xaqiijiyeen inuu geeriyooday Hoggaamiyahoodii hore, Abuubakar Sheku, kaasi oo ay sheegeen in lagu dilay Iska horimaad ay la galeen Maleeshiyo taabacsan Kooxda Daacishta ee Galbeedka Afrika ka dagaalanta.
Wakaalladda Wararka Faransiiska ee AFP oo la soo garsiiyey Fariinta Muuqaalka ee Boko Haram waxaa lagu sheegay inay Hoggaamiyaha Cusub u doorteen Bakura Madu, kaasi oo ka soo muuqday Muuqaalkaasi oo aan Taariikh lahayn.
Hoggaamiyaha cusub waxa uu ugu baaqay Maleeshiyada Boko Haram inay ka soo horjeestaan Taliyaha Kooxda Daacish, Abu Muscab Al-Barnaawi, kaasi oo hore u shaaciyey inuu isagu dilay Hoggaamiyihii hore ee Boko Haram, Abuubakar Shekau.
In ka badan 400,000 oo qof ayaa lagu dilay Dagaalka ay Kooxda Boko Haram ka wadaan W/bari ee dalka Nigeria, kaasi oo socday tan iyo sanaadkii 2009-kii.
