Ra’iisul Wasaaraha Xukuumadda xilgaarsiinta Maxamed Xuseen Rooble ayaa si kulul uga hadlay Qaraxii Is-miidaaminta ahaa ee xalay ka dhacay Saldhiga Booliska degmada Waaberi ee Gobolka Banaadir oo jugtiisa siweyn loo maqlay.
Ra’iisul Wasaare Rooble ayaa Cambaareyay qaraxaas oo lagu weeraray Saraakiil Ciidan oo ku sugneyd Saldhiga Booliska Waaberi, isla markaana geystay khasaaro isugu jira dhimasho iyo dhaawac oo soo gaaray Saraakiil Ciidan.
Rooble ayaa marka hore tacsi u diray qoysaska ay ka geeriyoodeen Taliyihii Booliiska degmada Waaberi Gaashaanle Axmed Sheekh Cabdullaahi Baashane, Taliye ku-xigeenkii qeybta Weliyow Cadde, Askarta kale ee Ciidanka Booliska iyo dad shacabka ahaa.
“Inta dhimatay Allaha u naxariisto dhaawacyadana Allaha bogsiiyo. Falkani waxa uu tusaale cad u yahay sida aysan argagixisadu xurmo ugu hayn dhiigga Shacabka xilligan oo lagu jiro bisha barakeysan ee Ramadaan†ayuu yiri Ra’iisul Wasaare Rooble.
Ra’iisul Wasaaraha Xukuumadda xilgaarsiinta Maxamed Xuseen Rooble ayaa ku baaqay in loo midoobo, la iskana kaashado la dagaalanka Al-shabaab oo weeraro xiliyada qaarkood ka geysta Caasimadda dalka ee Magaalada Muqdisho.
Al-shabaab oo sheegatay Mas’uuliyada qaraxii ka dhacay Muqdisho ee lagu weeraray Saraakiil ka tirsan Ciidanka Booliska dowladda, iyagoona sheegay inay ku dileen Taliyihii Booliska Waaberi Axmed Cabdullaahi Baashane iyo ku-xigeenkii Booliska qeybta Waliyoow Cadde, ayna ku dhaawaceen Taliye ku-xigeenka Ciidanka Booliska Gobolka Banaadir.
