C/llaahi Cumar Fiidse ayaa waxaa Khamiistii la soo dhaafay la soo taagay Maxkamadda ku taalla magaalladda San Antonio ee Gobalka Teksas ee dalka Maraykanka, isagoo lagu soo oogay inuu ka been sheegay Baaritaano dhinacyadda Socdaalka iyo Argagixisadda oo lagu hayey.
Baarayaasha waxay sheegeen in Mobaylka Eedeysanaha laga helay inuu xiriir la sameeyey Maxamed Suleymaan oo ka mid ah Eedeysanayaasha ay Hay’addaha Ammaanka Uganda u xireen Qaraxyaddii ka dhacay magaalladda Kampala bisii July 11-dii ee sannadkii 2010-kii, laguna dilay in ka badan 70-qof.
Alshabaab ayaa sheegatay mas’uuliyadda Qaraxyadaasi oo dhacay habeenkii Finalka Koobkii K/cagta ee Caalamka, iyadoo dadka ku geeriyooday ama ku dhaawacmay ku jireen dad Maraykan ah.
Xeer-ilaaliye Mark Roomberg oo Khamiistii ka hadlay Maxkamadda ayaa u sheegay Garsoore Fred Biery inuu Eedeysane C/llaahi Cumar Fiidse u been sheegay Baarayaasha FBI-da inuu ku lug leeyahay falalka loogu yeero Argagixisadda.
Baarayaasha Argagixisadda ee Maraykanka ayaa iyagana u sheegay Maxkamadda  inEedeysane Fiidse  horey looga duubay hadal uu ku taageeray Alshabaab, isagoo sheegay inuu bixiyey 100,000 oo Dollar, oo ay Alshabaab ku iibsadeen Gaari Tekniko ah, kaasi oo uu xusay in Teknikadaasi lagu burburiyey dagaal dhacay sannadkii 2006-dii.
Mid ka mid ah dadkii Eedeysanaha kula xirnaa Xabsiga Socdaalka ee Pearsall ayaa FBI-da u gudbiyey hadalkaasi codka ahaa.
Molly Roth oo ah Qareenka difaacayey Eedeysane C/llaahi Cumar Fiidse ayaa beenisay Eedeysamahaasi, waxayna sheegtay inuusan Eedeysanaha ahayn Argagixiso.
Qareenka waxay sheegtay in Kiiskaasi looga dan leeyahay in Xabsiga loogu kordhiyo Eedeysanaha oo horey xukun loogu riday sannadkii 2013-kii.
Dhinaca kale, Garsooraha Maxkamadda ku taalla magaalladda San Antonio ee Gobalka Teksas ee dalka Maraykanka waxa uu ugu dambeyntii ku dhawaaqay in Eedeysane C/llaahi Cumar Fiidse lagu xukumay Xabsi 8 sanno ah.
©Radio Dalsan