Danjiraha Dowladda Federalka Somalia ee Kenya ee xilka ka sii degayo, Ambassador Mohamed Ali Nuur “Ameriko†oo ah Danjirihii ugu waqtiga dheer ee Somalia wakiil uga ahaa Kenya ayaa hadalkaasi ku sheegay Wareysi uu maanta siiyey Wargeyska The Standardmedia ee ka soo baxa magaalladda Nairobi, wuxuuna sheegay in weeraradda ay Alshabaab geystaan loo fasirin mid ay dadka Soomaaliyeed wada geysteen.
“Mararka qaarkooda waxaan ku arkaa Warbaahinta oo marka ay wax ka dhacaan Kenya sheegayo inay Soomaalida falkaasi geysteen†ayuu yiri Ambassadorka, oo intaasi ku daray inaysan sax ahayn in Soomaalida oo dhan lagu asteeyo falalka ay Alshabaab geystaan.
Diplomaasigu waxa uu tilmaamay inay Dowladaha Somalia iyo Kenya ku mideysan yihiin La-dagaalanka Alshabaab, wuxuuna intaasi ku daray inay labada Waddan leeyihiin caddow guud, loona baahan yahay in loo midoobo dagaalladaasi, waa sida uu hadalka u yiri.
Danjire Ameriko, waxa uu Dowladda Kenya uga mahad celiyey sida ay u qaabileen Nus Malyanka Qaxootiga Soomaalida ee ku sugan Xerooyinka Qaxootiga ee W/bari Kenya iyo kaalinta ay Ciiddanka Kenya ee qeybta ka ah Hawlgalka AMISOM ee dagaalladda kula jira  Xarakadda Alshabaab.
Dhinaca kale, Ambassador  Ali Ameriko oo tan iyo sannadkii 2007-dii ahaa Safiirka Somalia u jooga Kenya ayaa sheegay inuusan weli go’aan ka gaarin Xilka soo socda ee uu qaban doono,
Waxa uu xusay inuu dhawaan ku soo laaban doono Muqdisho, si uu Kulamo Dib-u-heshiisiin ah ula yeesho Ururradda Bulshadda iyo Qurbo-joogta.
Si kastaba ha ahaatee, waxaa jira warar sheegaya inuu Ambasaador Mohamed Ali Ameriko rajo ka qabo inuu isku soo taago doorashadda Madaxtinimadda ee lagu wado in la qabto sannadka soo socda.