Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen Muungaab, ayaa Axadda maanta ah hoggaamiyay munaasabad lagu shaaciyay natiijada Imtixaanka Shahaadiga ah ee Fasalka 8aad ee Dugsiyada Dhexe, kaas oo lagu qabtay magaalada Muqdisho. Munaasabadda waxaa lagu shaaciyay magacyada iyo xogta ardayda galay saddexda kaalin ee ugu sarreysa, kuwaas oo kala ah Sumayo Xasan Abshir Aadam (kaalinta 1aad), Balqiisa Maxamed Cumar Maxamed (kaalinta 2aad), iyo Axmed Cabdinaasir Cabdullaahi Cabdi (kaalinta 3aad).
Munaasabadan ayaa muhiim u ah sababtoo ah waxay muujinaysaa sida Maamulka Gobolka Banaadir ugu go’an tahay horumarinta waxbarashada iyo dhiirrigelinta ardayda. Ardayda waxaa la guddoonsiiyay abaalmarinno isugu jiray Dahab, Computer laptop iyo hadiyado kale, si loogu dhiirrigeliyo dadaalkooda waxbarasho iyo kobcinta aqoontooda, taasoo noqonaysa mid ugu horraysa oo maamulku uu ku abaal-marinayo ardayda .
Guddoomiyaha Maamulka Gobolka Banaadir, Dr. Xasan Maxamed Xuseen Muungaab, oo hambalyo u diray dhammaan ardayda ka qaybgashay imtixaanka, ayaa xusay in waxbarashadu tahay tiirka aasaasiga ah ee horumarka bulshada iyo dhismaha jiil aqoon, karti iyo mas’uuliyad leh. Waxa uu ardayda ku boorriyay inay sii laba-jibaaraan dadaalkooda waxbarasho, kana faa’iideystaan fursadaha loo abuurayo mustaqbalkooda.
Isagoo intaas ku daray, waxa uu ballanqaaday in saddexda arday ee kaalimaha galay uu Maamulka Gobolka uu si buuxda uga daboolayo qarashka waxbarashada dugsiga sare. Munaasabadda waxaa goobjoog ka ahaa mas’uuliyiin heerar kala duwan, bahda waxbarashada, macallimiin, waalidiin iyo arday.
