Madaxweynaha Soomaaliya Xasan Sheekh Maxamuud ayaa magaalada Jabuuti kaga qeyb-galay kulan saddex-geesood ah oo ay wada yeesheen Madaxweynaha Jabuuti Ismaïl Omar Guelleh iyo Ra’iisul Wasaaraha Itoobiya Abiy Ahmed.
Kulanka ayaa diiradda lagu saaray xoojinta iskaashiga saddexda dal, gaar ahaan dhinacyada amniga gobolka, la dagaallanka argagixisada, dadaallada dimuqraadiyeynta Soomaaliya iyo xasilloonida guud ee Geeska Afrika.
Madaxda ayaa sidoo kale ka wada hadlay horumarinta maalgashiga, fududeynta isu-socodka dadka iyo ganacsiga, iyo dhismaha kaabeyaasha dhaqaalaha si loo xoojiyo isdhexgalka iyo koboca dalalka gobolka.
Warar soo baxaya ayaa sheegaya in kulanka lagu soo qaaday dib u soo celinta wadahadallada siyaasadeed ee u dhexeeya Soomaaliland iyo Soomaaliya, iyadoo arrintaas ay kaalin ka qaadan karaan madaxda Jabuuti iyo Itoobiya.
Madaxweyne Xasan Sheekh Maxamuud ayaa uga mahadceliyay dowladda iyo shacabka Jabuuti martigelinta kulankan, isagoo carrabka ku adkeeyay muhiimadda ay leedahay sii wadista wada-tashiyada lagu xoojinayo xiriirka iyo iskaashiga dalalka gobolka.
Kulankan ayaa ku soo beegmaya xilli Itoobiya ay dadaal ugu jirto helitaanka marin badeed, halka Jabuuti ay isku dayayso inay isu soo dhoweyso Soomaaliya iyo Itoobiya si loo yareeyo xiisadaha siyaasadeed ee la xiriira arrimaha Soomaaliland.