Ruushka ayaa mar kale fuliyay weerar ballaaran oo ka dhan ah dhowr magaalo oo waaweyn oo ku yaalla dalka Ukraine, iyadoo bartilmaameedku ahaa xarumo ku yaalla caasimadda Kyiv iyo magaalada Kharkiv.
Mas’uuliyiinta magaalada Kyiv ayaa sheegay in nidaamyada difaaca cirka ay si buuxda u shaqeeyeen, kaddib markii diyaarado aan duuliye lahayn (drones) oo Ruushku leeyahay ay duqeymo ka fuliyeen degmooyin kala duwan oo ka tirsan caasimadda.
Duqa magaalada Kyiv, Vitalii Klitschko, ayaa qoraal uu soo dhigay baraha bulshada ku sheegay in magaalada ay wajahday “weerar ballaaran oo cadownimo ah”, isagoo shacabka ugu baaqay in ay taxaddar muujiyaan.
Dhanka kale, maamulka milatariga ee Kyiv ayaa xaqiijiyay in weerarradaasi ay sababeen dab ka kacay ugu yaraan laba goobood oo ku yaalla magaalada.
Magaalada Kharkiv, oo ah tan labaad ee ugu weyn Ukraine, ayaa sidoo kale la kulantay duqeymo ay fuliyeen diyaarado aan duuliye lahayn oo Ruush ah. Weerarradaasi ayaa lagu garaacay dhowr degmo, waxaana la sheegay in ugu yaraan saddex dhisme oo ay dad deggen yihiin ay waxyeello soo gaartay.
Duqa magaalada Kharkiv ayaa sheegay in weerarkaasi ay ku dhaawacmeen ugu yaraan 11 qof, iyadoo xaaladda amniga magaalada ay weli kacsan tahay.