Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta Salaadda Jimcaha kula tukaday boqolaal ka mid ah shacabka magaalada Muqdisho, Masjidka Abuu Hureyra oo ku yaalla Suuqa Bakaaraha.
Madaxweynaha waxaa wehliyay qaar ka mid ah xubnaha Golaha Wasiirrada, Taliyeyaasha Ciidanka Qalabka Sida iyo Guddoomiyaha Gobolka Banaadir, kuwaas oo si wadajir ah ula tukaday dadweynaha.
Madaxweyne Xasan Sheekh ayaa khudbad uu ka jeediyay masjidka kaga hadlay xaaladda guud ee dalka, dadaallada diblumaasiyadeed iyo sharci ee ay dowladda ka waddo la-dagaallanka faragelinta shisheeye, iyo tallaabooyinka uu ku tilmaamay kuwa gurracan ee ka dhan ah midnimada iyo madaxbannaanida Soomaaliya.
Madaxweynaha ayaa xusay in Dowladda Federaalka Soomaaliya ay guulo muhiim ah ka gaartay halganka diblumaasiyadeed ee looga hortagayo damaca gurracan ee Israa’iil, isaga oo ugu baaqay shacabka Soomaaliyeed inay si midnimo leh uga hortagaan halista faragelinta shisheeye iyo isku-day kasta oo lagu doonayo in dalka laga sameeyo saldhigyo sharci-darro ah oo laga huriyo colaadaha gobolka.
Madaxweyne Xasan Sheekh Maxamuud ayaa carrabka ku adkeeyay in midnimada shacabka Soomaaliyeed ay tahay tiirka ugu weyn ee lagu difaaci karo madax-bannaanida iyo danaha qaranka.
