Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa maanta si rasmi ah magaalada Muqdisho uga daahfuray Qorshaha Hiigsiga Qarni-jirka 2060-ka, oo ah hindise ballaaran oo lagu hagi doono mustaqbalka dalka muddo 35 sano ah.
Hiigsigan fog ee istiraatiijiga ah ayaa ka kooban 7 qorshe Qaran oo shan sanadood ah, kuwaas oo diiradda lagu saarayo sidii Soomaaliya u noqon lahayd dal mideysan, ammaan ah, koboc dhaqaale leh, una gudba heerka dalalka dakhliga dhexe ee sare marka la gaaro sanadka 2060.
Lataliyaha Madaxweynaha ee Arrimaha Dhaqaalaha, sidoo kalena ah Guddoomiyaha Golaha Dhaqaalaha Qaranka, Xasan Aadan Hoosow, ayaa sheegay in hirgelinta qorshahan ay horseedi doonto horumar baaxad leh.
“Haddii Qorshaha Hiigsiga Qarni-jirka 2060-ka la hirgeliyo, Soomaaliya waxay noqon doontaa dal barwaaqo ah,” ayuu yiri Xasan Hoosow.
Sidoo kale, Wasiirka Gaashaandhigga Xukuumadda Federaalka Soomaaliya, Axmed Macallin Fiqi, oo ka hadlay madasha, ayaa carrabka ku adkeeyay in qorshahani uu isbeddel weyn ku keeni doono dalka iyo dadka Soomaaliyeed.
“Qorshaha Qarni-jirka 2060-ka wuxuu isbeddel weyn ku sameyn doonaa dalka iyo dadka Soomaaliyeed,” ayuu yiri Wasiir Fiqi.
Shirka daahfurka Qorshaha oo socon doona muddo saddex cisho ah, waxaa ka qeyb galaya Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, wasiirro, xildhibaanno ka tirsan labada Aqal ee Baarlamaanka, wakiillo ka socda Beesha Caalamka, iyo marti-sharaf kale.
