Diyaarado dagaal ayaa duqeymo culus ka fuliyay deegaano ka tirsan gobollada Shabeellaha Hoose iyo Jubbada Dhexe, halkaas oo ay ku sugnaayeen saldhigyo muhiim ah oo ay lahaayeen Al-Shabaab.
Warar lagu kalsoonaan karo ayaa sheegaya in duqeymo xoogan oo ka dhacay deegaanka Basra lagu bartilmaameedsaday xubno ka tirsan kooxda Al-Shabaab. Ilo-wareedyo ku sugan aagga la weeraray ayaa tilmaamaya in weerarkaasi si gaar ah loo beegsaday xubno ka tirsan hogaanka kooxda.
Sidoo kale, duqeymo kale oo la mid ah ayaa ka dhacay degmooyinka Sablaale, Kuunya Barow iyo Haawey, kuwaas oo lagu weeraray saraakiil sare oo ka tirsan Al-Shabaab, sida ay xaqiijiyeen ilo amni.
Inkasta oo weeraradu ahaayeen kuwo si weyn loo abaabulay, weli lama xaqiijin khasaaraha rasmiga ah ee ka dhashay duqeymahaas. Dowladda Federaalka Soomaaliya weli kama aysan bixin war rasmi ah oo faahfaahinaya howlgalka iyo natiijadiisa.
Weeraradan ayaa qeyb ka ah dadaallada joogtada ah ee lagu wiiqayo awoodda kooxda Al-Shabaab, iyadoo xoogagga amniga iyo saaxiibadooda caalamiga ah ay sare u qaadeen duullaanka ka dhanka ah Alshabaab.
