Magaalada Jowhar ee Caasimadda Hirshabeelle ayaa waxaa Goordhow gaaray Madaxweynihii hore ee Soomaaliya Sheekh Shariif Sh Axmed iyo wafdi uu hoggaaminayo.
Garoonka diyaaradaha Jowhar ayaa waxaa Sheekh Shariif iyo wafdiga la socday siweyn ugu dhaweeyay Mas’uuliyiin kala duwan oo ka tirsan Xildhibaano, Wasiir, Siyaasiyiin, Saraakiil iyo qeybaha kala duwan ee Bulshada.
Warar la helayo ayaa sheegaya in Ujeedka Sheekh Shariif uu yahay sidii loo dardar-gelin lahaa ololaha Doorashada Guddoonka Baarlamaanka dowlad Goboleedka Hirshabeelle iyo tan Madaxweynaha oo maalmaha soo socda la filayo inay dhacaan.
Madaxweynihii hore ee Soomaaliya ayaa inta uu ku sugan yahay Jowhar waxaa uu kulan uu la qaadan doonaa Mas’uuliyiin ka tirsan Hirshabeelle, Xildhibaanad Cusub, siyaasiyiin iyo qeybaha kala duwan Bulshada, isagoo kala hadli doono arrimo kala duwan.
Socdaalka Madaxweynihii hore ee Soomaaliya ayaa waxaa ku soo aadayaa, iyadoo shalay si rasmi ah loo dhaariyay Xildhibaanada Cusub ee Baarlamaanka labaad ee Maamulka Hirshabeelle, kuwaasi oo doortay Guddoon KMG ah, iyagoona kadib dooran doona Guddoonka Baarlmaanka iyo Madaxweynaha hoggaamin doona Maamulkaas.
Ammaanka guud ee Magaalada ee Caasimadda Hirshabeelle ayaa Maanta siweyn loo adkeeyay, waxaana ciidamo gaar ah lagu arkayaa wadada isku xirta Garoonka diyaaradaha Jowhar iyo Xarunta Madaxtooyadda Maamulka.
