Ciidamada dowladda Federaalka Soomaaliya iyo kuwa Maamulka Galmudug ayaa gudaha Magaalada Caabudwaaq ee Gobolka Galgaduud ka bilaabay howlgal qorsheysan oo ka dhan ah Maleeshiyaadka hubeysan.
Ciidamadaan oo isugu jira Boolis, kuwa xoogga dalka iyo NISA ayaa howlgalkaas ka wada xaafaddaha kala duwan ee Caabudwaaq, iyagoona ku raadinaya ragga maleeshiyaadka ah ee hubka la dhuumaaleysanaya.
Saraakiisha hoggaaminaya howlgalka ayaa sheegaya in Ciidanka amniga ay Magaalada ka baadi goobayaa Nin ay sawirkiisa soo Bandhigeen, iyagoona ninkaas ku maray inuu hubka dhigo, isla markaana Ciidanka amniga isku soo dhiibo.
Sidoo kale Saraakiisha ayaa dadka hubka sharci darrada heysta ku amray inay hubka dhigaan, iyagoona tilmaamay in cidii fulin weyda amarkaas laga qaadi doono tallaabo adeg oo sharciga waafaqsan.
Dhawaan ayay aheyd markii magaalada Caabudwaaq ee gobolka Galgaduud lagu dilay laba ruux oo kamid ahaa dadka deegaanka, waxaana dadkaas dilay rag hubeysan oo u abaabulan qaab maleeshiyo beeleed ah, kuwaasi oo haatan laga raadinayo gudaha Magaalada.
