Shirkadda Diyaaradaha Kenya Airways ayaa ku shaaca ka qaatay inay joojisay duulimaadyadii ay ku tegi jirtay dala dhowr ah oo ay ku jirto Soomaaliya, kuwaasi oo dhamaantood ka tirsan Afrika.
Qoraal kasoo baxay Shirkadda diyaaradaha Kenya Airways ayaa lagu sheegay in Shirkaddu joojisay duulimaadyadii caalamiga ahaa ay ku tegi jirtay 8-Caasimadood, iyadoona sababta ka hadashay.
Sababta ayay ku sheegtay Shirkadda inay tahay dhibaato dhaqaale xoogan oo soo wajahday dalalkaas, isla markaana aysan laheyn awood ay ku sii wadi karaan duullimaadyada.
Caasimadaha ay ka joojisay duulimaadyadeeda Shirkadda Kenya Airways ayaa waxaa kamid ah Muqdisho (Soomaaliya), Jabuuti (Jabuuti), Khartoum (Suudaan), Luwanda (Angola), Maputa (Mosambiik), Blantyre ( Malawi), Bamako (Maali) iyo Brazzaville ( Jamhuuriyadda Kongo).
Ugu dambeyn Shirkadda Diyaaradaha Kenya Airways ayaa tilmaamay inay sii wadi doonto Isku xirka duulimaadyada ee Shirkadaha ay wada-shaqeynta leeyihiin, waxaana Go’aanka joojinta duulimaadyadii ay ku tegi jirtay dalalkaas uu kusoo aadayaa, iyada oo hal isbuuc kadib, dib la furay duulimaadyada Caalamiga ee Kenya, xili kal horey loo xiray Cudurka COVID-19.
