Kadib xabbad-joojin ay taageertay dowladda Maraykanka bishii Oktoobar ee la soo dhaafay, dagaalkii u dhexeeyay Xamaas iyo Israa’iil ayaa isu beddelay loollan ku saabsan cidda gacanta ku heysa maamulka gudaha ee Qasa.
Dagaalka ayaa si weyn u wiiqay cutubyadii milatari ee caadiga ahaa ee Xamaas, kuwaas oo isu beddelay kooxo dhuumaaleysi ah oo kala firirsan. Inta badan hoggaamiyayaashii kooxda waa la dilay, kaabayaashii iyo dhismooyinkii Qasa badankoodna waa la burburiyay, halka dadweynihii deegaanka ay barakaceen, dhaqaaluhuna uu noqday mid aad u liita. Wasaaradda Caafimaadka ee ay maamusho Xamaas ayaa sheegtay in in ka badan 72,000 oo qof lagu dilay dagaalka iyo weerarrada Israa’iil.
Si kastaba, afar bilood kadib xabbad-joojinta, wararka ka imanaya Qasa ayaa muujinaya in Xamaas ay mar kale ballaarineyso saameynteeda, gaar ahaan dhinacyada amniga, canshuur ururinta iyo bixinta adeegyada dowladeed. Arrintan ayaa dhalisay su’aalo ku saabsan qorshaha fog ee kooxda iyo in ay diyaar u tahay inay wareejiso hubkeeda iyo awoodda, sida ku xusan wejiga labaad ee qorshaha nabadda ee uu soo jeediyay Donald Trump.
Maxamed Diab, oo ah u dhaqdhaqaaqe xuquuqda aadanaha oo ku sugan Qasa, ayaa sheegay in Xamaas ay “dib ula wareegtay xukunka in ka badan 90 boqolkiiba aagagga ay joogaan,” taasoo muujinaysa in kooxda ay weli leedahay awood maamul oo ballaaran inkasta oo dagaalku si weyn u saameeyay.
