Taliska Ciidanka Asluubta Soomaaliyeed ayaa Goordhow shaaciyay Khasaaraha rasmi ah ee ka dhashay dagaalkii shalay Xarunta Xabsiga Dhexe ee Xamar ku dhexmaray Maxaabiis ku jirta xabsiga iyo Ciidanka ilaalada ka haayay halkaas.
Afayeenka Ciidanka Asluubta G/sare Cabdiqani Maxamed Qalaf oo la hadlay warbaahinta ayaa sheegay in dagaalka uu ka dhashay khasaaro isugu jira dhimasho iyo dhaawac, uuna socday muddo ku dhow laba saacadood, wallow markii dambe lasoo afjaray.
Afhayeen Cabdiqani Qalaf ayaa sheegay in dagaalka ay ku geeriyoodeen 15 Maxaabiis ah oo ay ku jiraan kuwii marka hore qoryaha qaatay ee weerarka ku bilaabay Ciidanka ilaalada Xarunta xabsiga, waxaana halkaas ku dhaawacmay 7 Maxbuus, kuwaasi oo si la geeyay Xarum Caafimaad.
Sidoo kale Afhayeenka Asluubta ayaa sheegay in Ciidanka Ilaalada Xabsiga dhexe dagaalka looga dilay Afar Askari, halka mid kalena dhaawac uu soo gaaray, kaasi oo la dhigay Xarun Caafimaad si loogu dabiibo.
Ugu dambeyn Afhayeen sare Cabdiqani Maxamed Qalaf ayaa waxaa tilmaamay in xaaladda xabsiga haatan ay tahay mid degan, isla markaana la aasay maxaabiistii halkaas ku geeriyootay, ayna howlihii xabsiga si caadi ah dib ugu soo laabteen.
Si kastaba dagaalkii shalay ka dhacay Xabsiga dhexe ee Xamar ayaa yimid, kadib markii 4 kamid ah Maxaabiista ku jirta halkaas ay qoryo ka qaateen Ciidamo ilaalo ka haayay Xarunta, iyadoo dagaal adeg uu goobta ka dhacay, hayeeshee markii dambe afarta Maxbuus ay toogteen Ciidanka amniga dowladda oo weerarka soo afjaray.
