Qiimaha dahabka ee suuqyada caalamka ayaa Isniintii sare u kacay kadib markii uu hoos u dhac weyn ku yimid qiimaha shidaalka, taasoo keeni karto in sicir-bararka la yareeyo. Dahabka waxa uu si cad uga faa’iidaystay dhaqdhaqaaqa laba geesoodka ah ee saliidda iyo doollarka Maraykanka, kuwaas oo labaduba hoos u dhaceen kadib markii la yeeshay rajo deganaansho oo u dhexeysa Mareykanka iyo Iiraan. Qiimaha dahabka waxa uu sare u kacay 1.4% isagoo gaaray $4,110.56 halkii wiqiyad, iyadoo dahabka mustaqbalka ee Maraykankuna uu kacay 1%.
Kororkani ayaa yimid iyadoo maalgashadayaashu ay si dhow ula socdaan kulanka Bangiga Dhexe ee Mareykanka (Federal Reserve) ee la filayo inuu dhaco usbuucaan. Sannad ka badan, dahabka ayaa hoos uga dhacay heerarkiisii ugu sarreeyay, kuwaas oo gaaray qiyaastii $5,600 halkii wiqiyad, taasoo sabab u ahayd sicir-bararka joogtada ah iyo filashada in la kordhiyo dulsaarka.
Saliidda ayaa hoos u dhacday 4% ka dib markii sarkaal ka tirsan Iiraan uu sheegay in Tehran ay joojin doonto weeraradeeda ilaa Mareykankuna uu sidaas sameeyo . Tani waxay ku timid kadib markii Madaxweynaha Mareykanka Donald Trump uu hakiyay ololihii duqaynta, iyadoo lataliyayaashiisa ay u sheegeen in bartilmaameedyadu ay yaraadeen .
Khubarada ayaa sheegaya in dahabka uu weli yahay mid ka mid ah meelaha ugu muhiimsan ee ay maalgashadayaashu u wareegaan marka ay jiraan hubanti la’aan siyaasadeed iyo dhaqaale . Tim Waterer oo ah falanqeeye sare oo ka tirsan KCM Trade, ayaa yiri: “Dahabku waa mid si cad uga faa’iidaysta dhaqdhaqaaqa laba geesoodka ah ee saliidda iyo doollarka. Saliid hoose ayaa yareynaysa walaaca sicir-bararka.”
Dhinaca kale, indhaha suuqyada ayaa ku wajahan go’aanka Fed-ka, iyadoo la filayo in dulsaarka la joojiyo, balse suurtagal ah in la kordhiyo Sebtembar, taas oo saameyn ku yeelan karto jihada dahabka mustaqbalka . Sidoo kale, ra’yiga khubarada ayaa isku raacsan in dahabka uu sii kori doono, iyadoo bangiyada waaweyn sida Goldman Sachs ay saadaaliyeen inuu gaari doono $4,900 dhamaadka sanadka.
