Rooboow oo Makka kormeeray: 11,615 xaaji Soomaaliyeed oo si habsami leh loo raray
Makkah, 25 May 2026 – Wasiirka Awqaafta iyo Arrimaha Islaamka Xukuumadda Federaalka Soomaaliya, Sheekh Mukhtaar Rooboow Cali, ayaa maanta kormeer ku tegay hoteelada Makka ee laga rarayo xujeyda Soomaaliyeed, iyadoo qeybtii ugu horeysay ay gaartay Mina, si loo hubiyo in ay si habboon ugu gudaan acmaasha Xajka.
Kormeerkani wuxuu muhiimad gaar ah u leeyahay xilligan, iyadoo sanadkan ay ka qeyb galayaan 11,615 xaaji Soomaaliyeed oo ka mid ah malaayiinta xujeyda caalamka. Wasaaradda Awqaafta ayaa dadaal weyn ku bixineysa sidii loo fududeyn lahaa safarka iyo joogista xujeyda, iyadoo tiro badan oo iyaga ka mid ahi ay markii ugu horreysay xajka u tagayaan.
“Waxaan xogwareysanay qaar ka mid ah xujeyda iyo howl-wadeenada rarayo, waxaana la dardaarmay in si masuuliyad ah loo guuriyo xujeyda,” ayuu yiri Wasiir Sheekh Mukhtaar Rooboow intii uu ku guda jiray kormeerka. “Wasaaraddu waxay ku dadaaleysaa sidii xujeyda Soomaaliyeed si wanaagsan ay ugu gudan lahaayeen acmaasha iyo waajibaadka Xajka.”
Wasiirka waxa uu hoosta ka xarriiqay in Wasaaraddu isku xirneyd maamulka Sacuudi Carabiya si loo hubiyo in hoteelada iyo gaadiidka ay buuxiyaan heerarka looga baahan yahay. Waxa uu sheegay in xajka sanadkan uu socdo si nidaamsan, iyadoo aan la soo sheegin wax dhibaato ah.
Xaaji ka mid ah kuwii la kormeeray ayaa sheegay inuu ku faraxsan yahay qaban-qaabada, isagoo u mahadceliyay Wasaaradda dadaalka ay gashay. Sidoo kale, howl-wadeeno ka tirsan guddiga xajka ayaa sheegay in qeybtii koowaad ee xujeyda ay si nabadgelyo leh u gaartay Mina, iyadoo aan la kulmin caqabado weyn.
Kormeerku wuxuu qayb ka yahay qorshe ballaaran oo ay Wasaaradda Awqaafta u samaysay sidii loo wanaajin lahaa adeegyada xujeyda Soomaaliyeed sanad walba.
