Muungaab oo ka jaray xarigga xarunta cusub ee degmada Shingaani – ‘Adeegga dadweynaha ayaa sare loo qaaday
Muqdisho, Maajo 25, 2026 – Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa maanta si rasmi ah u xarigga ka jaray Xarunta Maamulka Degmada Shingaani, ka dib dib-u-dhis iyo casriyeyn ballaaran lagu sameeyay, si loo xoojiyo hufnaanta maamulka loona sare qaado adeegyada dadweynaha.
Dib-u-dhiska xarumaha dowladda ayaa muhiimad weyn u leh Soomaaliya, iyadoo sanado dhaawac iyo burbur ay hoos u dhigeen kalsoonida shacabka ku qabta hay’adaha dawliga ah. Maamulka Gobolka Banaadir waxa uu ballan qaaday in uu sii wado casriyaynta degmooyinka si loo soo celiyo kalsoonida loona hubiyo in canshuurta laga qaado shacabka ay ku soo laabato adeegyo tayo leh.
“Dib-u-dhiska iyo tayeynta xarumaha dowladdu waxay laf-dhabar u yihiin horumarinta adeegyada bulshada iyo dhisidda kalsoonida shacabka,” ayuu yiri Duqa Muqdisho, Dr. Muungaab. “Maamulka Gobolka Banaadir wuxuu ka go’an yahay in la sii xoojiyo dhismaha xarumaha adeegga dadweyne, taasoo ka dhigan in dib loogu celinaayo canshuurta laga qaado shacabka ku dhaqan caasimadda Muqdisho.”
Duqa ayaa intaas ku daray in hay’adaha ka shaqeeya gowraca xoolaha iyo dadka wax haysta ee munaasabadda Ciid-ul-Adxa ay tahay in ay taageeraan oo gargaaraan bulshada qaybaha nugul. Waxa uu bogaadiyay guulaha laga gaaray amniga, kuna baaqay in la xoojiyo wada-shaqeynta bulshada iyo hay’adaha amniga.
Munaasabadda xarig-ka-jarka waxaa goobjoog ka ahaa Wasiirka Qoyska iyo Xuquuqul Insaanka XFS, Marwo Khadiijo Maxamed Al-Makhzuumi, Wasiir Ku-xigeenka Hawlaha Guud Mudane Maxamed Xuseen Gaaraxo, Guddoomiye Ku-xigeenka Arrimaha Bulshada Mudane Cabdicasiis Cusmaan Maxamed, Guddoomiyaha Degmada Shingaani, odayaasha dhaqanka, iyo mas’uuliyiin kale.
Guddoomiyaha Degmada Shingaani ayaa sheegay in xarunta cusub ay ka kooban tahay qolal shaqo oo casri ah, hool shirar, iyo qayb loogu talagalay in lagu qabto shacabka adeegyada deg-degga ah. Ilo ka socota Maamulka Banaadir ayaa sheegay in degmooyinka kale ay si lamid ah uga midho dhalan doonto barnaamijka dib-u-dhiska inta u dhexeysa 2026 iyo 2028.
