Dagaalka u dhexeeya Iran iyo xulafada Mareykanka iyo Israel ayaa weli socda, iyadoo xiisadda milatari ay saameyn ku yeelatay guud ahaan gobolka Bariga Dhexe.
Ciidamada Difaaca Israel, Israel Defense Forces (IDF), ayaa soo saaray warbixin ku saabsan howlgalladooda toddobaad kadib markii ay bilaabeen weerarro ay si wadajir ah ula fuliyeen Mareykanka oo ka dhan ah Iran.
Afhayeenka IDF, Effie Defrin, ayaa sheegay in ciidamada Israel ay fuliyeen qiyaastii 3,400 weerar, isla markaana ay naafeeyeen in ka badan 150 nidaam oo difaac hawada ah oo ay lahayd Iran.
Dhanka kale, Wasaaradda Difaaca ee Mareykanka ayaa sheegtay in 7 askari oo Mareykan ah ay ku dhinteen dagaalka u dhexeeya Mareykanka iyo Iran, taas oo ka dhigaysa tirada dhimashada ciidamada Mareykanka ilaa hadda toddobo askari.
Dhinaca kale, Sacudiga ayaa sheegay in nidaamyadiisa difaaca hawada ay qabteen oo burburiyeen gantaal ballistic ah oo lagu weeraray saldhigga milatari ee Prince Sultan Air Base. Saldhiggan ayaa ku yaalla magaalada Al Kharj, qiyaastii 101 km koonfur-bari kaga beegan caasimadda Riyadh.
Wasaaradda Difaaca Sacuudiga ayaa sidoo kale sheegtay inay joojisay laba weerar oo drone ah oo laga soo diray dhanka woqooyi ee magaalada Riyadh.
Dhanka kale, Imaaraadka Carabta ayaa sheegay in nidaamyadooda difaaca hawada ay burburiyeen 16 gantaal ballistic ah isla markaana ay joojiyeen 113 diyaaradood oo drone ah Axaddii, kuwaas oo laga soo tuuray Iran.
Bayaan ay wasaaradda difaaca Imaaraadka ku daabacday baraha bulshada ee X ayaa lagu sheegay in la ogaaday 17 gantaal ballistic ah, balse 16 ka mid ah la burburiyay, halka hal gantaal uu ku dhacay badda. Sidoo kale waxaa la sheegay in la ogaaday 117 drone, kuwaas oo 113 la qabtay, halka 4 drone ay ku dhaceen gudaha dalka.
Xiisadda dagaalkan ayaa sii kordhisay walaaca laga qabo in colaadda ay ku faafto dalal kale oo ku yaalla Bariga Dhexe, iyadoo dalal badan ay ku baaqayaan in xal diblomaasiyadeed lagu soo afjaro colaadda.