Ciidamada dowladda Suuriya ayaa shaaciyay inay dib u bilaabeen howlgallo militari oo ay ku doonayaan inay gacanta ugu soo dhigaan xaafado ay Kurdu deggen yihiin oo ku yaalla magaalada waqooyi ee Aleppo.
Xaafadaha Sheekh Maqsoud iyo Ashrafiyah ayaa haatan gacanta ku haya ciidamada Kurduudda, kuwaas oo si adag uga horjeeda qorshaha Madaxweynaha Suuriya, Ahmed al-Sharaa, ee ah in dagaalyahannadooda lagu daro maamul dhexe oo dowladeed.
Loollan dhanka awoodda ah oo u dhexeeya labada dhinac ayaa sababay afar maalmood oo isku dhacyo culus ah, kuwaas oo ka dhacay gudaha magaalada Aleppo. Goob-joogayaal ayaa sheegay in la maqlayay rasaas joogto ah, iyadoo la adeegsaday hub culus iyo gantaallo.
Wararka ka imanaya magaalada ayaa sidoo kale sheegaya in ugu yaraan 21 qof oo rayid ah ay ku dhinteen iska horimaadyada, halka kumanaan qof oo kale ay ku qasbanaadeen inay ka barakacaan guryahooda, iyagoo ka cararaya amni-darrada ka taagan Aleppo.
Xiisadda ka taagan xaafadahaasi ayaa weli sii socota, iyadoo walaac laga muujinayo saameynta bini’aadannimo ee dagaalka iyo khatarta uu ku hayo dadka rayidka ah.