Dowladda Eritrea ayaa shaacisay inay ka baxday xubinimadii Urur Goboleedka IGAD, sida ay sheegtay Wasaaradda Warfaafinta ee dalkaasi.
Wasaaraddu waxay arrintan ku xaqiijisay bayaan ay soo saartay 12-kii December, 2025.
Ma ahan markii ugu horreysay oo Eritrea ay ka baxdo xubinnimada IGAD. Sannadkii 2007-dii ayay iska casishay xubinimadii ururka, iyadoo sabab looga dhigay in IGAD aysan buuxin karin rajadii ay ka filayeen dadka gobolka iyo Eritrea gaar ahaan.
Ka dib 16 sano, Eritrea ayaa dib u cusbooneysiisay xubinnimadeeda, iyadoo markaas rajaynaysay in ururku uu fuliyo dib-u-habeynta ay Eritrea doonaysay, sida ay wasaaraddu sheegtay.
Wasaaradda Warfaafinta Eritrea ayaa bayaan ay soo saartay ku sheegtay in IGAD aysan ilaalin danaha Eritrea, isla markaana ay ku fashilantay xaqiijinta xasilloonida iyo rabitaanka shacabka gobolka.
“IGAD waxa ay si xun u sii waday inay dib uga dhacdo mas’uuliyadeeda iyo baahideeda,” ayaa lagu yiri bayaanka.
Bayaanka ayaa intaa ku daray in IGAD ay ku guuldarreysatay inay gaarto faa’iidooyin istiraatijiyadeed oo laga sugayay xubnaheeda, kuwaas oo lagu xaqiijin lahaa nabadda iyo xasilloonida gobolka iyo xoojinta xiriirka ka dhexeeya dalalka xubnaha ah. Waxa kale oo lagu sheegay in ururku ku fashilmay inuu wax weyn ka geysto xasilloonida gobolka.
Eritrea ayaa sidoo kale dib u xasuusatay inay door muhiim ah ka ciyaartay xoojinta IGAD xilligii ururka dib loo habeynayay.
