Madaxweynaha Mareykanka, Donald Trump, ayaa si toos ah u beegsaday muhaajiriinta Soomaaliyeed ee ku nool Maraykanka, isagoo ku tilmaamay bulshada inay “waxba ku soo kordhin… anigu ma doonayo inay dalkeenna joogaan.”
Trump ayaa hadalkan ka jeediyay kulan golaha wasiirrada, isagoo intaa ku daray in Mareykanku “aadi doono jihada khaldan haddii aan sii wadno inaan dalkeenna ku qaabilno khashin.”
Hadalladiisu waxay ku soo beegmayaan xilli la filayo howlgal lagu qaban-doono dadka laga saaray amarro masaafuris ah ee ku nool gobolka Minneapolis, halkaas oo ay degan yihiin dad badan oo asal ahaan Soomaali ah.
Mas’uuliyiinta Minnesota ayaa qorshahan cambaareeyay, iyagoo ku tilmaamay cunsuriyad iyo halis ku jirta in si khalad ah loo qabto muwaadiniin Maraykan ah. Guddoomiyaha gobolka, Tim Walz, ayaa sheegay:
“Waxaan soo dhaweyneynaa baarista dambiyada, laakiin buunbuuninta iyo in si indho la’aan ah loo beegsado muhaajiriinta ma aha xal dhab ah.”
Hoggaamiyeyaasha deegaanka ayaa sidoo kale Trump ku eedeeyay isku day lagu khalkhal gelinayo bulshada, iyagoo ku baaqay in la ilaaliyo xuquuqda dadka muhaajiriinta ah.
