Taliyaha ciidamada Sudan, Janaraal Abdel Fattah al-Burhan, ayaa si kulul u dhaliilay soo jeedintii cusub ee Mareykanka iyo dhexdhexaadiyeyaasha gobolka ee lagu doonayey in lagu joojiyo dagaalka sokeeye ee ka socda dalkaas. Burhan wuxuu sheegay in qorshahan uu yahay “kii ugu liitay ee abid soo mara,” isla markaana uusan u adeegayn danaha shacabka Sudan.
Burhan, oo hadalka ka jeediyay muuqaal la baahiyay, ayaa ku adkaystay in heshiiska xabbad-joojinta ee lala galayo ciidamada Taageerada Degdegga ah (RSF) uu hoos u dhigi doono awoodda Ciidamada Qalabka Sida, islamarkaana uu sharciyeyn doono joogitaanka maleeshiyada ee goobaha ay hadda ku sugan yihiin.
Sidoo kale, wuxuu si toos ah u weeraray ergayga Mareykanka, Massad Boulos, isaga oo ku eedeeyay inuu “ku hadlo afka Imaaraadka Carabta,” oo uu ku tilmaamay dowlad taageero buuxda siisa RSF. Imaaraadka ayaa ka mid ah dalalka door ka leh dadaallada dhexdhexaadinta, balse Khartoum ayaa hore ugu eedeysay inay si militari u gacan siinayaan RSF.
Hadallada Burhan ayaa muujinaya in waddada xalka siyaasadeed ee Sudan ay weli tahay mid ciriiri ah, xilli dagaalka u dhexeeya labada ciidan uu sababay kumannaan dhimasho ah, malaayiin kalena ku barakaceen gudaha dalka.
