Midowga Musharaxiinta u taagan qabshada xilka Madaxweynaha Soomaaliya ayaa Goordhow War kasoo saaray Go’aan ay dowladda Federaalka Soomaaliya ugu yeertay Safiirkeedii Kenya u joogay, kuna wargelisay Safiirka Kenya inuu dalkiisa wadatashi ugu laabto.
War-saxaafadeed kasoo baxay Musharaxiinta Madaxweynaha ayaa waxaa marka hore walaac looga muujiyay Go’aankii ay qaadatay Xukuumadda waqtiga kasii dhammanaya ee ku aadan Arrimaha siyaasadda ee diblomaasiyada.
Golaha Musharaxiinta ayaa sheegay in Go’aankii dowladda ay u arkaan mid hoos u dhigaya xiriirka u dhexeeyo Soomaaliya iyo Kenya, isla markaana Go’aankaas uu yahay loo isticmaalayo ololo Doorasho, loona xeerin danta Qaranka iyo Shacabka Soomaaliyeed.
Sidoo kale Musharaxiinta ayaa Madaxweyne Maxamed Cabdullaahi Farmaajo uga digay inuu arrimaha siyaasadda dibadda ee dalka u adeegsado olole Doorasho, naceyn iyo Cadaawadna ka dhex abuuro dalalka deriska ah ee Soomaaliya iyo Kenya.
Midowga Musharaxiinta Madaxweynaha ayaa caddeeyay inay ka welwelsan yihiin saameynta taban ee xiriir xumida labada dal ku yeelan karo Soomaalida Ganacsiga ku leh dalkaas iyo Ardayda halkaas waxbarashada u joogta.
Qoraalka kasoo baxay Musharaxiinta ayaa kusoo aadaya, iyadoo dowladda Soomaaliya dalka ka cerisay safiirkii Kenya u joogay Muqdisho, isla markaana Safiirka dowladda ee Maxamuud Axmed Nuur Tarsan lagu amray inuu dalka dib ugu soo laabto, iyadoo Kenya lagu eedeeyay faragelin ay ku heyso Arrimaha Soomaaliya gaar ahaan Jubbaland.
Hoos ka Akhriso Qoraalka kasoo baxay Musharaxiinta xilka Madaxweynaha.
