Dowladda Federaalka Soomaaliya ayaa War kasoo saaray dagaal xoogan oo shalay ka dhacay deegaanka Bacaadweyn ee Gobolka Mudug, kaasi oo dhexmaray Ciidanka dowladda, dadka deegaanka iyo Al-shabaab.
Qoraal kasoo baxay Wasaaradda Warfaafinta ayaa waxaa lagu boggaadiyay dadka deegaanka oo la sheegay inay dagaal adeg la galeen Al-shabaabkii shalay weerarka ku qaaday deegaanka Bacaadweyn.
Sidoo kale Qoraalka ayaa waxaa lagu sheegay in dagaalkii dhacay lagu dilay 51 dagaalame oo ka tirsanaa Shabaabka, halka 6 kalena iyaga oo dhaawac ah gacanta lagu dhigay oo uu ku jiray Sarkaalkii hoggaaminayay Weerarka, waa sida hadalka loo dhigay.
Dowladda ayaa caddeeysay in weerarka ay ku dhinteen 15 qof oo isugu jiray dadka deegaanka iyo Askarta Ciidanka dowladda Federaalka, iyadoo tacsi loo diray qoyskii dadkaas ay ka geeriyoodeen.
Dhinaca Al-shabaab dhankooda war goor horey oo Maanta kasoo baxay lagu sheegay in dagaalkii deegaanka Bacaadweyn ay ku dileen 56 Askari oo ka tirsan Ciidanka dowladda, isla markaana ay gacanta ku dhigeen 6 gaari oo nooca dagaalka, ayna ku rakiban yihiin Qoryo waaweyn uu kamid yahay Zuuga.
Waxaa kaloo dagaalamayaasha Al-shabaab soo Bandhigeen gaadiidka ay dagaalka ku qabsadeen iyo Meydad ay ku sheegeen inay yihiin Askartii Ciidanka dowladda ee dagaalka lagu dilay oo ku jireen Saddex Sarkaal.
Hoos ka Akhriso Qoraalka kasoo baxay dowladda Federaalka Soomaaliya.
