Ugu yaraan 4 ruux oo shacab ah ayaa geeriyooday, halka saddex kalena ay dhaawacyo kala duwan soo gaareen, kadib markii xalay uu shil gaari uu ka dhacay deegaan ka tirsan dowlad deegaanka Soomaalida Itoobiya.
Shilkaas ayaa sigaar ah uga dhacay inta u dhexeeysa tuulooyinka Labicalaan iyo Geedi ee degmada Dhagaxbuur ee dowlad deegaanka, waxaana uu yimid Shilkaas, kadib markii ay isku dhaceen laba gaari oo mid uu ahaa nooca xamuulka qaado ah.
Madaxda shilalka ee Gobolka Jarar ee dowlad deegaanka Qoordheere Axmed Xasan oo warbaahinta ka howlgasha halkaas la hadlay ayaa waxaa uu sheegay in Meydadka iyo dhaawacyada la geeyay Xarumo Caafimaad.
Qoordheere Axmed Xasan ayaa Darawalada gaadiidleyda ah ee ka howlgala Ismaamulka ugu baaqay inay si taxdar leh u wadaan gaadiidka, xiliyada ay isticmaalayan waddooyinka buuleyda ah, si aysan u dhici shilal geysta khasaaro kala duwan.
Dhowr mar ayuu sidaan oo kale shilal kala duwan oo geystay khasaaro isugu jira dhimasho iyo dhaawac uga dhaceen deegaano ka tirsan dowlad deegaanka Soomaalida, waxaana goobtii xalay uu shilka ka dhacay Sawirro laga qaaday ay muujinayeen in gaadiidka xamuulka ahaa uu sidarran u burburay.