Wararka aan ka helayno Magalada Dhuusamareeb ee Xarunta Maamulka Galmudug ayaa waxaa ay sheegayaan in halkaas Caawa ay ka jirto xaalad cabsi ah oo gudaha Magaalada iyo degaanada ku dhow laga dareemayo.
Dadka deegaanka ayaa sheegaya inay jirto Cabsi laga qabo in dagaalamaayasha Al-shabaab ay Magaalada weerar ku qaadaan, iyadoo cabsi arrintaas ku aaddan laga daremayo Magaalada, waxaana la soo werinayaa in Al-shabaab ay ku sugan yihiin meel Dhuusamareeb u jirta 20-KM oo kaliya.
Sidoo kale Ciidamo farbadan oo ka tirsan kuwa sida gaarka u tababaran ee Haramcad iyo kuwa qeybta 21-aad ee Ciidanka Xooga ayaa la geeyay Garoonka diyaaradaha Dhuusamareeb, kuwaasi oo la sheegay inay yihiin kuwa aad u hubeysan, isla markaana ay welinayaan Ciidanka Jabuuti ee qaybta ka ah howlgalka AMISOM.
Ilo-wareedyo lagu kalsoonaan karo ayaa sheegaya in Al-shabaab ay jareen wadada laamiga ah ee u dhexeeysa Magaalooyinka Dhuusamareeb iyo Guriceel ee Gobolka Galgaduud.
Si kastaba Ciidanka Xoogga dalka ayaa dhawaan Al-shabaab kala wareegay deegaano ka tirsan Gobolka Galgaduud, waxaana labada dhinac dhexmaray dagaalo geystay Khasaaro isugu jira dhimasho iyo dhaawac, iyadoona Galmudug sheegtay inay dooneyso inay la wareegto deegaan ay ku hayaan shabaab.
