Ciidamo ka tirsan kuwa xoogga dalka qeybta 21-aad iyo kuwo Nabadsugid ah ayaa la wareegay amniga guud ee deegaanka Xananbuure ee Gobolka Galgaduug, halkaas oo uu dagaal xoogan ku dhexmaray laba Maleeshiyo beeleed.
Dagaalkaas ka dhacay Xananbuure ayaa waxaa ka dhashay baraago laga cabo biyo oo laga qoday deegaanka, waxaana Maleeshiyaadka ay dagaalkooda isku adeegsadeen hubka noocyadiisa kala duwan.
Ciidamada Xoogga ayaa haatan ku sugan deegaanka, iyagoona kala dhex-galay labada Maleeshiyo, isla markaana la wareegay amniga Xananbuure ee Gobolka Galgaduud, sida uu sheegay Sarkaal ka tirsan Ciidanka dowladda.
Wararka ayaa intaas kusii daraya in deegaanka ay saacadaha soo socda ay gaari doonaan Ciidamo kale oo ka tirsan Galmudug oo kasoo ambabaxay Magaalada Dhuusamareeb, iyagoo kala dhex-galaya Maleeshiyo beeleedka.
Dagaalkii dhacay ayaa waxaa ka dhashay Khasaaro isugu jira dhimasho iyo dhaawac oo soo kala gaaray labada dhinac, waxaana halkaas ku dhintay 11 qof oo uu ku jiro Wasiirkii hore ee shaqada Galmudug, halka 25 qof kalena uu dhaawac soo gaaray.
