Guddiga Madaxa bannaan ee Doorashooyinka Qaranka ayaa Xarunta Qaramada Midoobay ee Magaalada Muqdisho kulan ku yeeshay Hay’addo Caalami ah oo taageera doorashooyinka Soomaaliya.
Kulankan oo ahaa mid xog is dhaafsi ah ayaa intuu socday waxaa heerka diyaar garowga ee Arrimaha Doorashooyinka ka war bixisay Guddoomiye Xaliimo Ismaaciil Ibraahim (Xaliimo Yarey).
Guddoomiye Xaliimo Yarey ayaa si qota dheer ka qeyb galayaasha kulanka ugu faah-faahisay halka ay Guddiga wax u marayaan, hawlaha muhiimka ah ee qabsoomay, kuwa gaabiska ku jira iyo kuwa hakadka ku jira intaba.
Sidoo kale Guddoomiayaha ayaa shirka ka sheegtay in culeysya dhaqaale iyo kuwo farsamo ay gaabiska iyo hakadka hawlaha qaar ay sabab u yihiin.
Dhankooda hay’adahan caalamiga ee daneeya doorashooyinka Soomaaliya ee shirka joogay ayaa muujiyay sida ay ula dhacsanyihiin wax qabadka Guddiga iyada oo ay ku hor gudbanyihiin caqabo siyaasadeed, kuwa dhaqaale iyo kuwa farsamo.
Ugu danbeyntii hay’aduhu waxay ballan qaadeen in ay Guddiga ka taageeri doonaan sidii waddanka ay uga hirgeli lahaayeen doorasho qof iyo cod ah markii ugu horreysay muddo 50 sano ah.
