Madaxweynihii hore ee Soomaaliya Sheekh Shariif iyo wafdi uu hogaaminayo ayaa gaaray Magaalada Cape Town ee dalka Koonfur Afrika,iyadoo halkaas siweyn loogu soo dhaweeyay.
Sheekh Shariif iyo wafdiga la socday ayaa waxaa Garoonka Diyaaradaha Caalamiga ah ee Cape Town International Airport kusoo dhaweeyay dadweyne farabadan oo ahaa Jaaliyadda Soomaaliyeed ee halkaas kunool,iyadoo wadatay Boorar ay ku xardhan yihiin sawirkiisa.
Madaxweynihii hore ee Soomaaliya ayaa waxaa uu sheegay in uu aad uga faraxsan yahay soo dhaweeynta ballaaran ee loogu soo dhaweeyay Dalka Koonfur Afrika,isagoo ka mahadceliyay.
“Waxaan aad ugu faraxsanahay soo dhaweyntan qaaliga ah ee aad ii muujiseen, waana kala war qaadanaynaa Maalmaha soo socdana waan idinla joogi doonaa” ayuu yiri Sheekh Shariif.
Madaxweynihii hore ee Soomaaliya Sheekh Shariif ayaa inta uu ku sugan yahay Magaalada Cape Town ee dalka Koonfur Afrika waxaa uu kulamo kala duwan la qaadan doonaa Jaaliyada Soomaaliyeed ee halkaas kunool iyo ganacsatada,isagoona ka xog-wareysan doona xaaladooda iyo dhibaatada dalkaas ku heysta.
