Wadooyinka qaar ee Magaalada Muqdisho ee Caasimada dalka Soomaaliya ayaa Maanta xiran,waxaana lagu arkayaa Ciidamo farabadan oo ka tirsan dowladda Soomaaliya.
Ciidamo ka tirsan kuwa Booliska Soomaaliya oo wata gaadiidka Dagaalka ayaa waxa lagu arkayaa Wadooyinka iyagoo taagan,waxaana dadka iyo gaadiida gaarka loo leeyahay u diidayaan in ay isticmaalaan wadada,iyagoona dadka ay yihiin kuwo lugeeynaya.
Wadooyinka Ciidamada ay xireen ayaa waxaa kamid ah Isgoyska Banaadir, Soobe, Tarabuunka, Howl-wadaag, iyo wadooyinka soo gala iyo kuwa kabaxa Maka Al-mukarama iyo kuwo kale oo aad ugu muhiimsan isku socodka dadka iyo gaadiidka.
Habeenimadii xalay aheyd ayaa warar aan helnay waxa ay sheegayaan in Ciidamo badan la dhigay qeybo kamid ah Isgoysyada iyo Koontaroolada Magaalada Muqdisho,waxaana aad loo adkeeyay saakay amniga guud ee Magaalada Muqdisho ee Caasimadda Soomaaliya.
Inta badan Shacabka kunool Gobolka Banaadir ayaa dhibaatooyin ku qaba xiliyada ay xiran yihiin wadooyinka Magaalada,iyagoona goobahooda ganacsiga iyo Waxbarashada ku tega Cagtooda.
