Madaxweyne ku-xigeenka Maamulka Jubbaland Maxamuud Sayid Aadan ayaa faah faahin ka bixiyay qaraxyadii saakay ka dhacay Degmada Baardheere ee Gobolka Gedo.
Waxa uu sheegay Maxamud Sayid Aadan in qaraxyadaasi Ciidamada AMIOSM ee  ku sugan Baardheere ay fashiliyeen,isla markaana ay uga hortegeyn Afaafka hore ee Degmadaasi.
Madaxweyne ku-xigeenka Maamulka Jubbaland oo ku sugan Degmada Baardheere oo la hadlay VOA-da ayaa sheegay in qarax hore ay ku dhaawacmeen 2 ruux oo shacab ahaa oo xiliga uu qaraxa dhacayay ka agdhawaa goobta,isagoo xusaya in Askar ka tirsan Ciidamada AMISOM ay dhaawacyo ka soo gaareen qaraxa.
Qaraxa labaad ayuu sheegay in uu ahaa Miinooyin lagu aasay Wadadda dhexmarta Baardheere,kaasi oo geystay khasaaro isugu jira dhimasho iyo dhaawac,waxaana ku dhintay 2 ruux oo shacab ah,halka ay ku dhaawacmeen 5 qof oo kale.
War qoraal ah oo lagu daabacay baraha internet-ka Al-shabaab ayaa waxa ay ku sheegteen Mas’uuliyadda qaraxyadii ka dhacay Degmada Baardheere,iyagoo sheegay in ay ku dileen Sarkaal ka tirsan Ciidamada Itoobiya,halka dhowr Askari ay ku dhaawaceen.
Hoos ka Dhageyso Codka Maxamuud Sayid Aadan.
