Ra’iisul Wasaaraha Israa’iil, Benjamin Netanyahu, ayaa si adag uga falceliyay weerar gantaal ah oo ay Xuutiyiintu kusoo rideen dhul ku dhow garoonka diyaaradaha Ben Gurion ee magaalada Tel Aviv, isagoo wacad ku maray in dalkiisu uu si xooggan uga aargudi doono kooxdaasi fadhigeedu yahay Yemen.
Weerarka oo dhacay subaxnimadii Axadda, ayaa sababay dhaawaca ugu yaraan lix qof, iyadoo gantaalku ku dhacay meel u dhow terminal-ka saddexaad ee garoonka, sida ay xaqiijiyeen saraakiisha ammaanka. Waxaa sidoo kale la arkayay uuro madow kacaysa iyo darawallo baxsanaya iyadoo la maqlayay seeriga digniinta weerarka cirka.
Netanyahu oo muuqaal ku baahiyay baraha bulshada ayaa yiri, “Waan weerarnay horey, waanan weerari doonnaa mar kale. Ciddii na weerarta, toddoba laab ayaan uga aargudi doonnaa.” Waxa uu sheegay in weerarkaasi uu yahay mid “toos uga yimid Iran” isla markaana Israa’iil ay kaga jawaabi doonto “goorta iyo goobta aanu dooranno.”
Xuutiyiinta oo ah jabhad Shiico ah oo ay taageerto Iran, kana dagaallanta gudaha Yemen, ayaa sheegtay mas’uuliyadda weerarka. Waxay sidoo kale hanjabeen inay Israa’iil saari doonaan “cunaqabatayn cirka ah” ayna bartilmaameedsan doonaan garoomada diyaaradaha, taas oo ay uga jawaabayaan duqeymaha Israa’iil ay ka waddo Qasa.
Sida ay warbaahinta Israa’iil tebisay, nidaamka difaaca hawada ee dalkaasi – oo ay ku jiraan qalabka casriga ah ee Maraykanku sameeyay ee THAAD – ayaa ku guuldareystay inuu qabto gantaalkaasi. Taliye sare oo ka tirsan booliska Israa’iil ayaa wariyeyaasha tusay dalool weyn oo gantaalku sameeyay, inkasta oo aan la soo werin khasaare naf ah oo culus.
Garoonka Ben Gurion ayaa dib loo furay duullimaadyada kadib hakad kooban, hase yeeshee shirkado ay kamid yihiin Lufthansa, Air France iyo Delta ayaa baajiyay duullimaadyadii Axadda.
Dhacdadan ayaa imanaysa iyadoo xiisadda gobolka ay cirka isku sii shareerayso, xilli ay sii xoogeysanayaan isku dhacyada u dhexeeya Israa’iil, Xamaas iyo xulafadooda gobolka – oo ay kamid yihiin Xuutiyiinta Yemen.
