Warar Idaacada Dalsan ee Magaalada Muqdisho ay ka heleyso Degmada Mahadaay ee Gobolka Shabeellaha Dhexe ayaa waxaa ay ku waramayaan in halkaasi ay la wareegay Ciidamada dowladda Burundi ee qeybta ka ah howlaga AMISOM,kadib markii ay ka soo baxeen Ciidamadii dowladda Soomaaliya.
Ciidamada Burundi ayaa waxaa la sheegay in markii hore ay Saldhigyo ku lahaayeen meel ka baxsan degmada Mahadaay,isla markaana haatan ay la wareegeen gacanta ku heynta degmadaas.
Qof kamid dadka deegaanka oo la soo xiriiray Dalsan ayaa u sheegay in Ciidamo farabadan oo ka tirsan kuwa Burundi lagu arkayo Xaafadaha Magaalada,iyagoona soo galay kadib markii saakay ay halkaas isaga soo baxeen Ciidamada dowladda Soomaaliya.
Sidoo kale Ciidamada ayaa difaacyo hor leh ka sameeysanaya Degmada Mahadaay, halka markii horey ku sugnayeen meel ka baxsan degmada.
Ciidamo farabadan oo ka tirsan kuwa Dowladda Soomaaliya ayaa saakay isaga soo baxay qeybo kamid ah Gobolka Shabeellaha Dhexe,waxaana kamid ah Mahadaay, Qalimow Garsaale,Haan sheekh iyo goobo kale oo ay ku lahaayeen Saldhigyo Militeri.
Wararka ayaa intaasi waxa ay ku darayaan in Ciidamada ay halkaas uga soo baxeen Mushaar la’aan soo wajahday Muddooyinkii dambe.
