Soomaaliya oo Brazil ku soo Bandhigtay Khibraddeeda Maalgelinta Cimilada
Agaasimaha Fulinta Sanduuqa Qaran ee Isbeddelka Cimilada Soomaaliya, Liban Obsiye, ayaa magaalada Salvador ee dalka Brazil kaga qaybgalay shir goboleed looga hadlay sidii loo heli lahaa loona xoojin lahaa maalgelinta wax-ka-qabashada isbeddelka cimilada.
Shirka oo socday saddex maalmood ayaa waxaa ka qaybgalay masuuliyiin maaliyadeed iyo khubaro ka kala socday dalal Afrikaan ah iyo kuwa Latin America. Kulanka waxaa diiradda lagu saaray caqabadaha dalalku kala kulmaan helitaanka maalgelinta cimilada iyo hababka lagu kordhin karo maalgelinta gudaha iyo tan caalamiga ah.
Ka qaybgalayaashu waxay is-weydaarsadeen khibrado ku saabsan isticmaalka dakhliga gudaha, iskaashiga dowladda iyo ganacsiga gaarka loo leeyahay, maalgelinta khataraha musiibooyinka, caymiska, curaarta qurbe-joogta iyo deymaha. Sidoo kale, waxaa la soo bandhigay qaabab kala duwan oo dalalku u maareeyaan una abaabulaan maalgelinta la xiriirta cimilada.
Liban Obsiye ayaa shirka ku soo bandhigay xaaladda Soomaaliya, isaga oo sharaxay fursadaha jira, caqabadaha hortaagan helitaanka maalgelinta iyo baahida loo qabo in dhaqaalaha cimilada si wax-ku-ool ah loogu jiheeyo dalalka nugul ee si weyn u wajahaya saameynta isbeddelka cimilada.
Obsiye wuxuu sheegay in Soomaaliya ay ka mid tahay dalalka sida weyn ugu nugul dhibaatooyinka cimilada, isla markaana ay muhiim tahay in dowladda, bulshada iyo hay’adaha kale ay si wadajir ah uga shaqeeyaan xoojinta adkeysiga bulshada iyo ilaalinta nolol-maalmeedka dadka.
Shirka ayaa sidoo kale lagu adkeeyay muhiimadda iskaashiga caalamiga ah, hal-abuurka maaliyadeed iyo wadaagista khibradaha si loo helo xalal waara oo lagu taageero dalalka wajahaya abaaraha, fatahaadaha iyo dhibaatooyinka kale ee ka dhasha isbeddelka cimilada.
Kulankan oo ahaa meertadii labaad ee is-weydaarsiga gobollada ee wasaaradaha maaliyadda iyo cimilada waxaa si wadajir ah u soo qabanqaabiyey Hay’adda Horumarinta Faransiiska, Wasaaradda Maaliyadda Brazil, Bangiga Horumarinta Maraykanka, iyo Machadka Dhaqaalaha Cimilada.
