Muqdisho – Shir-sanaadeedkii 4aad ee Siyaasadda Dhaqaalaha, oo uu soo qabanqaabiyay Bankiga Dhexe ee Soomaaliya (BDhS), ayaa lagu soo gabagabeeyay magaalada Muqdisho iyadoo shirku uu socday laba maalmood. Shirkan waxaa ka soo qeyb galay in ka badan 75 hay’adood oo ay ka mid yihiin wasaarado iyo hay’adaha dowladda, hay’adaha caalamiga ah sida Bangiga Adduunka, ururrada bangiyada, xawaaladaha amaahda yar-yar shirkadaha caymiska jaamacadaha machadyada cilmi-baarista, iyo khubaro dhaqaale.
Shirkan ayaa muhiim u ah sababtoo ah waxa uu ka dhigan yahay isku-duwidda hay’adaha dhaqaalaha dalka si looga wada hadlo xasiloonida maaliyadeed iyo saameynta dhimista taageerada dhaqaale ee dibedda. Shirka waxaa si rasmi ah u furay Wasiirka Maaliyadda Mudane Biixi Iimaan Cige isagoo ku ammaanay Bankiga Dhexe qaban-qaabada shirkan sannadlaha ah isla markaana ku booriyey hay’adaha dowladda inay si wadajir ah uga wada shaqeeyaan arrimaha kobcinta dhaqaalaha dalka.
Guddoomiyaha Bankiga Dhexe, Mudane Cabdiraxmaan Maxamed Cabdullaahi ayaa soo dhaweeyay kaqaybgalayaasha, isagoo ka warbixiyay dadaallada xooggan ee Bankigu ku tallaabsaday dhowrkii sano ee lasoo dhaafay si loo kordhiyo xasiloonida maaliyadeed ee dalka. Waxa uu sheegay in Bankigu sii wadi doono dadaallada lagu xoojinayo nidaamka maaliyadeed iyo kor u qaadida kalsoonida dadweynaha.
Gudoomiye Ku-xigeenka Bankiga Dhexe Dr. Cali Yaasiin Sheekh Cali ayaa faahfaahiyey warbixinta sahanka helitaanka adeegga maaliyadeed oo Bankigu dalka ka sameeyey isagoo kaashanaya hay’adaha kala duwan ee dalka, gaar ahaan Hay’adda Istaatiistikada Qaranka. Waxa uu sheegay in sahankani uu muhiim u yahay sidii loo qiimeyn lahaa baahida bulshada iyo horumarinta adeegyada maaliyadeed.
Xubno ka tirsan Guddiga Maamulka Sare ee Bankiga oo ay ka mid ahaayeen Prof. Xuseen Warsame iyo Dr. Aways Sheekh, ayaa iyana jeediyey khudbado muhiim ah iyagoo soo jeediyey talooyin la xiriira hormarinta dhaqaalaha dalka iyo tayeynta hay’adaha dowladda. Waxay ku nuuxnuuxsadeen muhiimadda ay leedahay in la xoojiyo iskaashiga u dhexeeya hay’adaha si loo gaaro horumar dhaqaale oo waara.
Gabagabadii shirka waxaa si rasmi ah u soo xiray Marwo Xaniifa Maxamed Ibraahim oo ka tirsan Guddiga-maamulka Sare ee Bankiga Dhexe, iyadoo mahadcelin ballaaran u jeedisay dhammaan kaqaybgalayaasha iyo qabanqaabiyeyaasha shirka. Waxay sheegtay in shirku yahay mid muhiim u ah dib-u-habeynta siyaasadda dhaqaalaha dalka iyo xoojinta iskaashiga hay’adaha.
