Xamsa oo furay imtixaanka qaranka ee dugsiyada sare
Muqdisho, Sabti 20 Juun 2026 – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta si rasmi ah u furay bilowga Imtixaanka Shahaadiga ah ee Dugsiga Sare ee Sannadka 2026 iyo gunaanadka Imtixaanka Fasalka 8-aad ee Dugsiga Dhexe ee dalka, isagoo ku bogaadiyay macallimiinta, maamullada dugsiyada iyo ardayda dadaalka ay muujiyeen.
Imtixaankani wuxuu ka mid yahay tiirarka ugu muhiimsan ee Xukuumadda DanQaran, iyadoo waxbarashadu ay tahay halbeegga casriyeynta iyo dhismaha awoodda qaranka Soomaaliyeed. Ra’iisul Wasaaraha ayaa sheegay in dowladda ay maalgashi xooggan ku samaysay waxbarashada iyada oo ko juhdi iyo dadaal badna galisay mustaqbalka ardayda Soomaaliyeed iyo dhismaha aqoonta, heerarkeeda kala duwan.
“Waxbarashadu ma aha wadada guusha oo kaliya, ee waa halbeegga casriyeynta iyo dhismaha awoodda Qaranka Soomaaliyeed, waana tiir adag oo diini ah kaasi oo in badan lagu sheegay Qur’aanka iyo Sunnaha, waxa ayna ina tusinaysa mudnaanta ay leedahay in ardayda wax la baro,” ayuu yiri Ra’iisul Wasaare Xamsa Cabdi Barre.
Ra’iisul Wasaaraha ayaa intaas ku daray in himilooyinka qarni-jirka ah ee Xukuumadda DanQaran iyo Qorshaha Isbeddelka Qaranka (NTP) ay tiir dhexaad u yihiin horumarinta tayada waxbarashada dalka iyo casriyeynta nidaamyada iyo shuruucda kale ee dhanka tacliinta ah. Waxa uu xusay in waxbarashadu aysan ahayn mid lagu kalsoonaan karo gaar ahaan haddii aan la helin nidaam wax ku ool ah.
Ra’iisul Wasaare Xamsa ayaa ku dhiirrigeliyay ardayda sannadkan galaysa imtixaanka qaranka ee dugsiyada dhexe iyo kuwa sare, in ay guul iyo natiijo wanaagsan ka gaaraan, isaga oo bogaadiyay dadaalka Wasaaradda Waxbarashada XFS, macallimiinta Soomaaliyeed iyo maamullada dugsiyada. Waxa uu sheegay in ay yihiin kuwa ugu horreeya ee safka hore ka jira sidii loo gaari lahaa horumar la taaban karo.
Imtixaankani waxa uu ka dhacayaa magaalooyinka dalka oo dhan, iyadoo la filayo in tiro badan oo arday ah ay ka qeyb qaataan. Dowladda ayaa sheegtay in la qaaday tallaabooyin lagu hubinayo hufnaanta imtixaanka, iyadoo la joogteeyay kormeer ay wadaan hay’adaha dowladda.
