“Xoosh oo ku dhawaaqay: ‘Dowladaha hoose ayaa soo celinaya kalsoonida shacabka’”
Muqdisho, 23 May 2026 – Wasiirka Arrimaha Gudaha, Federaalka iyo Dib-u-heshiisiinta Xukuumadda Federaalka Soomaaliya, Mudane Cali Yuusuf Cali (Xoosh), ayaa maanta caasimadda Muqdisho ku daahfuray tababarka loogu talagalay golayaasha deegaanka ee degmooyinka Gobolka Banaadir, kaas oo ay ka qeybgaleen mas’uuliyiin dowladda iyo maamulka gobolka, oo uu ku mid ahaa Agaasimaha Guud ee Wasaaradda, Mudane Cabdulqaadir Cali.
Tababarkani wuxuu yimid ka dib doorashooyinkii golayaasha deegaanka ee bishii December la soo dhaafay, kuwaas oo ah kuwa ugu horreeya oo lagu doortay hanaan dimuqraadiyadeed oo ah qof iyo cod. Waxay ka dhigan tahay tallaabo muhiim ah oo Soomaaliya ugu socoto dib-u-dhiska dowladaha hoose, kuwaas oo lagu tilmaamo tiirka ugu muhiimsan ee dowladnimada casriga ah.
“Maanta waa maalin taariikhi ah, innagoo halkan ku daahfureyno tababarka golayaasha deegaanka ee Gobolka Banaadir, kuwaasi oo ay shacabku si toos ah, oo xor ah u doorteen bishii December ee la soo dhaafay,” ayuu yiri Wasiir Xoosh khudbaddiisii furitaanka. “Tilaabadaasi waxay ahayd farriin muujineysa in Soomaaliya ay ku socoto hannaan dimuqraadiyadeed oo ku dhisan rabitaanka shacabka iyo kaqeybgal bulsho, isla markaana dib loogu soo celiyo kalsoonida dadka iyo dowladnimada.”
Wasiirku waxa uu intaas ku daray in dowladaha hoose ay yihiin kuwa ugu dhow shacabka, isla markaana ay leeyihiin awoodo iyo masuuliyado ballaaran oo la xiriira horumarinta degmooyinka, ilaalinta danaha bulshada, kobcinta wada-noolaanshaha, iyo la shaqeynta hay’adaha amniga iyo maamulka. Marka ay si wanaagsan u shaqeeyaan, waxaa kordha kalsoonida shacabka, horumarkuna wuxuu gaaraa bulshada si degdeg ah.
Dowladda Federaalka ah waxay ka go’an tahay xoojinta karaanka golayaasha deegaanka iyo dejinta siyaasado kor loogu qaadayo adeegyada bulshada, si ay u gutaan waajibaadkooda ku xusan Xeerka Maamulka Golayaasha Degmooyinka. Tababarkani waxaa lagu bixin doonaa aqoon iyo xirfado ku saabsan maaraynta maaliyadda, qorshaynta horumarinta, iyo la dagaallanka musuqmaasuqa.
Dabayaaqadii, Wasiir Xoosh waxa uu ugu baaqay golayaasha deegaanka in ay si daacad ah ugu adeegaan shacabkooda, isla markaana ay ka shaqeeyaan midnimada iyo wadajirka degmooyinka.
