EU iyo Soomaaliya oo adkeeyay iskaashiga istiraatiijiga
Muqdisho, 10 May 2026 – Wasiirka Wasaaradda Qorsheynta, Maalgashiga iyo Horumarinta Dhaqaalaha Soomaaliya, Mudane Maxamuud C. Sheekh Faarax (Beenebeene), ayaa maanta ka qeybgalay Wadahadalka Iskaashiga Soomaaliya iyo Midowga Yurub (EU–Somalia Partnership Dialogue) oo lagu qabtay Xarunta Midowga Yurub ee Muqdisho, halkaas oo labada dhinac ay kaga wada hadleen xoojinta iskaashiga iyo hirgelinta Qorshaha Isbeddelka Qaranka.
Kulankan ayaa yimid xilli Soomaaliya ay fulinayso Qorshaheeda Isbeddelka Qaranka 2025–2029, kaas oo saldhig u ah kobaca dhaqaalaha, xoojinta dowlad-dhiska, iyo dhismaha bulsho adkeysi leh. Midowga Yurub ayaa ah mid ka mid ah hay’adaha ugu maalgashiga badan dalka, waxaana muhiim ah in taageerada caalamiga ah lala jaan qaado mudnaanta qaranka.
“Qorshaha Isbeddelka Qaranka waa saldhigga kobaca dhaqaalaha iyo dhiirrigelinta maalgashiga,” ayuu yiri Wasiir Beenebeene intii uu ka hadlayay kulanka. “Waxaan u baahanahay in taageerada horumarineed ee caalamiga ah si buuxda loogu waafajiyo mudnaanta qaranka, iyadoo xoogga la saarayo qorsheyn wadajir ah, hufnaan, isla xisaabtan, iyo isticmaalka nidaamyada dowladda.”
Wasiirka waxa uu intaas ku daray in Soomaaliya ay ka go’an tahay in la dhiso jawi ganacsi oo soo jiita maalgashiga, isla markaana laga faa’iidaysto barnaamijka EU Global Gateway ee kaabayaasha dhaqaalaha, tamarta, isku xirnaanta dijitaalka, iyo ganacsiga.
Kulanka waxaa si wadajir ah u guddoominayay Ra’iisul Wasaare Ku-xigeenka XFS, Mudane Saalax Axmed Jaamac, iyo Safiirka Midowga Yurub ee Soomaaliya, Marwo Francesca Di Mauro. Waxaa ka qeybgalay wasiirro, safiirro dalalka EU, iyo mas’uuliyiin kale. Safiirka EU ayaa sheegay in Midowga Yurub ay diyaar u tahay in ay taageerto dib-u-habeynta maamulka maaliyadda iyo dhaqaalaha, iyadoo la xoojinayo hufnaanta.
Wasiirka kulanka waxaa wehliyay Agaasimaha Guud ee Wasaaradda, Mudane Cabdifataax Cabdulqaadir Faarax. Labada dhinac ayaa isku raacay in la sii wado wadahadalka heer sare si loo gaaro faa’iido wadaag.
