Ciidanka milatariga Koonfur Afrika oo loo diray xaafadaha si dambiyada loola dagaallamo
Madaxweynaha dalka South Africa, Cyril Ramaphosa, ayaa go’aan adag qaatay ka dib markii uu u adkeysan waayay dambiyada iyo dilalka maalin kasta ka dhaca dalkaas. Madaxweynaha ayaa ansixiyay in ciidanka qaranka (milatariga) ay gudaha dalka soo galaan si ay u caawiyaan booliska oo ku dhibaataysan xakameynta kooxaha hubeysan.
Ciidamadan ayaa hadda bilaabay howlgallo laga fulinayo gobollada ugu dhibka badan sida Johannesburg iyo Cape Town. Waxa ay si gaar ah u beegsanayaan kooxaha baadda dadka ka qaata, kuwa macdanta sida sharcidarrada ah u qota, iyo burcadda abaabulan ee dhibka ku haysa shacabka.
Koonfur Afrika waxay hadda mareysaa heer aad u khatar ah, iyadoo tobanaan qof maalin kasta dalkaas lagu dilo. Dowladda waxay leedahay ciidanka in la keeno waa nafiskii ugu dambeeyay ee shacabku ku heli karaan ammaan.
Si kastaba ha ahaatee, waxaa jira walaac laga qabo in askarta milatariga aysan aqoon u lahayn sida loola macaamilo dadka shacabka ah, maadaama loogu talagalay dagaal balse aan loogu talagalay shaqo boolis. Khubarada qaar waxay qabaan in milatariga la keeno ay tahay xal ku meel gaar ah, balse loo baahan yahay in sirdoonka la xoojiyo si looga takhaluso madaxda kooxaha dambiyada ee magaalada dhexdeeda ku dhuumaaleysanaya.
